Tui ten unha clara vocación turística. A súa situación e os seus recursos naturais e patrimoniais constitúen un valor en alza. O conxunto histórico, o Camiño Portugués, o Parque Natural do Monte Aloia, o río Miño, a ruta xudía, a Eurocidade...son os eixos principais desta área. O Turismo amosase cada vez máis coma un dos principais recursos cos que contará Tui no futuro. A promoción é xa un eixo fundamental no desenvolvemento dun sector, que lentamente vai creando traballo e oportunidades na cidade. Unha tarefa na que todos deberemos implicarnos, por suposto o Concello como xestor pero tamén as empresas e os profesionais do sector.
O pasado mes de outubro Tui continuou sendo un importante punto de referencia turística na comarca e na provincia de Pontevedra. Durante este mes, un importante fluxo de turistas e peregrinos dinamizaron a actividade turística da cidade que se viu reflectida no número de visitantes da Oficina Municipal de Turismo. En total foron 2.659 os visitantes atendidos ao longo de outubro.
Os datos publicados pola Oficina do Peregrino da Catedral de Santiago correspondentes ao pasado mes de setembro continúan situando á cidade de Tui nos primeiros lugares escollidos polos peregrinos xacobeos para iniciar o seu Camiño cara a tumba do apóstolo Santiago na cidade de Santiago en calquera das rutas xacobeas. En concreto, un total de 5.255 peregrinos escolleron Tui para iniciar a súa peregrinación, un 35% dos 14.805 peregrinos que realizaron o Camiño Portugués o pasado mes de setembro.
A Oficina Municipal de Turismo de Tui atendeu o pasado mes de setembro un total de 4.897 visitantes, deles 3.200 eran turistas e 1697 peregrinos. Desta forma complétanse os datos de tempada de verán na que esta céntrica oficina de turismo tudense recibiu un total de 23.137 visitantes, deles 5.704 peregrinos e 17.433 turistas.
Este xoves pola tarde as persoas participantes no 22º Congreso Internacional de Formación para o traballo Norte de Portugal – Galicia realizarán unha visita cultural á cidade de Tui na que percorreran a Catedral de Tui, xunto a un paseo polo conxunto histórico tudense. O Congreso celébrase este xoves 22 e venres na Escola Superior de Ciencias Empresariais -IPVC de Valença.
Tui consolídase coma o segundo lugar de inicio do Camiño de Santiago, do mesmo xeito que o Camiño Portugués ocupa o segundo lugar nas rutas xacobeas elixidas polos peregrinos e peregrinas durante o mes de agosto.
A cidade de Tui súmase, un ano mais, á celebración das Xornadas Europeas da Cultura Xudía cun amplo programa de actividades que abrangue dende o xoves 1 de setembro ata o domingo 11 de setembro. Unha renovada oferta de actividades para difundir e valorizar o amplo patrimonio cultural tudense ligado á presenza da comunidade xudía e logo sefardí neste territorio de fronteira.
O Concello de Tui pon en valor das igrexas parroquiais coa instalación de sinalización turística nos templos de Santa Mariña en Areas, Santiago de Malvas, Nosa Señora da Guía en Randufe, O Anxo en Pazos de Reis, Santa Comba en Ribadelouro, San Mamede en Guillarei, San Xoán en Paramos, Santiago en Baldráns e San Martiño en Caldelas. Tamén se procedeu a sinalizar outros elemento patrimonial destacado coma é a Ponte do Mosteiro en Pexegueiro.
Un grupo de case cen veciños e veciñas do municipio cordobés de Valenzuela ,que están realizando o Camiño de Santiago, confeccionaran unha alfombras de flores ao longo da mañá deste xoves, 25 de agosto, no céntrico paseo da Corredoira fronte á Oficina Municipal de Turismo.
A Oficina Municipal de Turismo de Tui, no Paseo da Corredoira, acolle até finais de setembro unha mostra de cadros da tudense Rosa Mª Vila. Realizados en plumilla e acuarela retrata distintos lugares do conxunto histórico coma o túnel da Misericordia, as rúas San Telmo ou Entrefornos, o pórtico da Catedral ou o Paseo da Corredoira, xunto a outros lugares coma a cruz do Monte Aloia ou a vella Ponte Internacional. Amais presenta dous óleos un dunha panorámica da cidade dende a beira portuguesa do Miño e outra dun tramo do sendeiro dos muíños do río Tripes.
Mañá sábado comezará a funcionar unha liña directa de autobuses entre Tui e Praia América. A viaxe de ida será ás 12 h e o regreso ás 19.00 h. A duración do traxecto é de 40 minutos.
Este novo servizo é activado pola Xunta de Galicia tras a petición realizada dende o Concello de Tui. Manterase dende mañá e até finais do mes de agosto. Deste xeito dende Tui contarase cunha conexión directa con praia América en Nigrán.
